صور عجب ؟؟!!!

اتعلمت في الجامعة ان الصورة بتغني عن الاف الكلمات والنهارده حبيت اوريكم صور عجب بتغني عن ملايين الكلمات "اكيد هتكون عجب لانها موجودة في دنيا عجب ولا ايه ؟؟؟؟؟!!!!!!!!!!"

رمضان جانااااااااااا.............

كل سنة وانتم طيبين ..........

بدأ رمضان بتقاليده وعاداته اللي بتتغير من مكان لمكان ...يعني احنا عندنا في مصر عاداتنا اللي اتربينا عليها من زمان .. مش بس كده حتى اهلنا وجدودنا اتربوا عليها .. عندك مثلا الكنافة والقطايف , والفطار اول يوم يكون عند كبير العيله ..وحاجات تانية كتير .

المهم اول ما يقرب رمضان تلاقينا بنحط مينيو بحاجات رمضان .. وتبدأ تسمع الجملة المعروفة " الدنيا غليت ومش عارفين هنجيب الحاجات دي ازاي"..بس العجيب في كده انك تلاقي كل بيت كاتب في اول الحاجات دي فانوس رمضان .. لأ مش بس كده ده كمان اول حاجة بنجيبها الفانوس .. طب ليه كده مادام احنا بنشتكي من غلو الحاجة ونضطر نلغي حاجات كتير عشان مش عارفين هنجيب الفلوس منين ...

بس الأهم من كل ده والسؤال اللي نفسي حد يجاوبني عليه .. راحت فين فوانيس السنة اللي فاتت؟؟؟؟!!!!! وايه اللي حصلها عشان كل سنة نشتري فانوس !!!!! ياترى بتختفي زي ما بيختفي رمضان !! ولا تجار الفوانيس بيبعتوا الجني يلمها عشان يفضلو ياكلو عيش !! ولا هيا مصاريف وبس ؟؟!!! بصراحة دنيا عجب .........

من طلب العلا نام الليالي ..وشد اللحاف وقال انا مالي

عجبتني اوي الجملة دي ..فكرتني بايام الجامعة .. تلاقي نص الجامعة قاعدين في الكافتريات واللي مش لاقي مكان قاعد على السلالم او حتى الارض مش مهم المهم اننا نكون راضين عن نفسنا وعندنا اقتناع تام اننا الحمد لله بنعمل اللي علينا ده احنا بنروح لحد الجامعة صحيح مش بنحضر محاضرات بس احسن من غيرنا اللي قاعد في البيت او صايع في الشوارع مع ان مافيش فرق بين الاتنين بس ضميرنا مرتاح واللي يسألنا رايحين فين او جايين منين نقول من الجامعة ونقعد نشتكي من المجهود والتعب اللي بنلاقيه لما ننزل الجامعة .

وتعدي الايام واحنا على الحال ده لغاية ما يجي حد يقولنا جدول الامتحانات نزل نقعد مذهولين ..ايه حكاية المتحانات دي ؟؟احنا نسينا ان فيه امتحانات اصلا !!!...ولما نشوف فاضلنا كام يوم عشان نذاكر نلاقي كل الحكاية اسبوعين والمحظوظ اوي يلاقي نفسه عرف قبل الامتحانات باسبوعين ويوم ... ساعتها يبدأ كل واحد يراجع على الكتب اللي عنده ..اللي يلاقيهم ناقصين كتاب .. واللي يلاقي نفسه ماعندوش نص الكتب .. واللي يفتكر انه ما اشتراش الكتب اصلا ..وبعد كده يفكرو لسه يحطو جدول للمذاكرة !!

لو جربت ودخلت اي كافيه او مول او جنينة او حتى مشيت في الشارع وركبت مواصلات هتلاقي حاجة غريبة جدا ... الناس كلها بتذاكر وكأن الامتحانات جت فجأة .... حالة نشاط بتحصل مش معقولة.

وتعدي الامتحانات يوم ورا يوم .. واسبوع يجر اسبوع ... وتيجي ايام النتايج تلاقي كل واحد مش عاجباه نتيجته .. والغريب في كده انك تشوف اللي كانو قاعدين على السلالم وفي الشوارع ايام الجامعة لما يلاقو نفسهم شالو مادتين او تلاتة يقولو احنا اتظلمنا ومافيش عدل ويفضلو يدعو ويشتمو في الجامعة واللي عملوها ..ولو جربت وسألت واحد منهم كان عندك ايه السنة دي ؟ او ايه شكل الامتحانات ؟ او حتى عندك كام مادة ؟ يقولك مش فاكر اهي ايام وعدت ..ولما تفكر تسألهم طب انتم المفروض كنتوا جبتوا ايه ؟ تلاقي اقل واحد بيبصلك باستغراب لانك عبيط ومش فاهم ويقولك امتياز ..طبعا مع مراتب ومخدات الشرف .......صحيح دنيا عجب؟؟؟!!!!!!